國慶前夕 9月30日 星期六
放假喇......簡直係期待性嘅解放呀! 對上一次嘅假期應該數到七月一日,由於當時正值世界盃之戰,所以覺得前半個世界盃月都好似放緊假咁,差不多晚晚都通頂睇波波,當世界盃完結之後,我又要回到一個令人周身都唔自在嘅地方......辦公室! 等了一個100%工作狀態嘅八月之後,再嚟一個150%工作狀態嘅九月,終於......艱苦嘅時刻終於都過去喇,十月萬歲......萬歲~
後記: The smallest deed is greter than the grandest intention. (最卑微的作為都勝於最宏大的願望。)

秋來秋去 9月29日 星期五
月餅係中秋節至傳統嘅食物,我估應該係最重要啦,中秋如果唔食月餅就好唔似過節咁,都唔知點解人人都咁鍾意食月餅,大家睇見月餅嘅市場需求幾咁大,單單係一個香港每一年平均賣成過十萬盒月餅,就已經知道幾咁驚人啦......不過其實食月餅係好唔健康,淨睇含油量已經勁到爆晒燈,我通常只係食四分之一個就停口! 今年認真大整古喇,公司先嚟送一人一盒美心雙黃白蓮蓉月餅,之後輪到判頭又一人一盒榮華雙黃白蓮蓉月餅,再嚟公司四大盒大班冰皮月餅,又之後我媽咪買嘅美心冰皮綠豆蓉月餅兩大個......點食~
後記: If you obey all the rules, you miss all the FUN. (凡事都規行矩步，就毫無樂趣了。)

發冷 9月28日 星期四
原來回顧自己嘅一生係幾咁有意思,我今年二十六歲,人生路仲有排行,不過人到了某一個年幾,慢慢會將"自己"忘記,呢個"自己"係指以前嘅自己,一年前又好,十年前也好,現在嘅自己到底同以前嘅"自己"有咩分別呢? 每個人都以為2006年就係做緊我自己,咁1997年嘅我又係咪做緊自己呀! 一個好得意而有哲理嘅人生問題,再諗深一層其實會發現自己變晒喇,當然有好多人外表睇起嚟無咩轉變,但係內在已經變質喇......反省~
後記: No matter HOW big or soft or warm your bed is, you still have to get out of it. (床不論多大多軟多暖，您都得起來。)

晴不像晴 9月27日 星期三
之前我都有講過話有幾個同事開始讀夜校,真係努力可加,其實睇住佢地嘅背影,就好似睇緊自己咁,幾年前嘅我同樣係夜校青年,當時十九歲嘅我仲係好天真,出嚟社會工作只有一個月多,對呢個奇幻世界充滿希望,後嚟為左要充實自己,就走去讀夜校,一心以為努力學習就可以完成入讀大學之路,可惜到左知道自己嘅極限去到邊度嘅時候,暗地裡覺得自己幾咁天真,呢個社會同我所諗嘅係兩回事,大腦嘅學習機能到極限,金錢嘅負擔到極限,讀書嘅熱誠到極限,一切一切都已經超出我嘅能力,醒悟~
後記: 要把每一天都當作人生的最後一天，因為那一天總會來臨。

秋前 9月26日 星期二
好臭呀......好臭呀......我終於都搞到自己一身都係"C"喇,原本以為有圖可以畫,有project比我跟,點知老闆竟然比埋晒D無無謂謂嘅工作我做,我生平最討厭就係做sales同paper works呢兩樣,第一就係我把口唔多好(並非口齒伶俐形),正確D嚟講應該係唔識咩叫做口甜舌滑,第二就係我記性同埋專注力好差,一大堆文件放晒响我面前,我好容易就會唔記得我睇過咩,跟住明明睇完嘅file,一轉眼就會唔見埋......就係因為我有呢兩大缺點,所以我先至唔想做,但係好可惜皇命難為呀~
後記: 出人頭地法則七：認定目標，全力爭取

季節風 9月25日 星期一
近排工作變得清閒好多,原先跟開三單project,之後變兩單,最後得返一單响手,而今日已經將最後一單project嘅工作做好晒,其實已經拖得就拖,拖埋今日應該唔可以再拖,我自己都拖到有D怕怕,所以要完結始終都係要完嘅,再拖落去只會比老闆發現,到時又搞到自己一身都係屎就唔多好啦,聽日應該要坦白從寬,開始其他新嘅工作~
後記: 出人頭地法則六：不要認命

變切風 9月24日 星期日
星期日可以有咁耐瞓咁耐真係幾好,加上屋企又做就一個非常安寧嘅空間,今朝我瞓到十點左右起身,一個星期能夠有一天得到充足嘅睡眠,實在係難得...難...難能可貴呀......天氣好當然就要出門做運動啦,食過早餐之後就大變身,一身簡樸嘅運動短衫褲,再配合一支半滿嘅凍水,起程......唔知係咪今朝返風呢,出一身大汗之後覺得自己有D病病地,可能身體未到三十歲已經開始走下坡喇~
後記: 出人頭地法則五：行動才有回報

熱與風 9月23日 星期六
今日出奇咁靜喎,未聽到鬧鐘響我已經起身,當然仲係好想繼續瞓啦,不過星期六都係要返工嘅,強迫自己起身啦! 到我上巴士之後,竟然比我坐响個幾好樣嘅女仔旁邊,而今日巴士都同樣出奇咁靜,冇人濆口水啦,都冇人大大聲講電話啦,可能係架巴士少了很多人,一覺瞓醒就落車喇......返到公司之後先知道May姐今日請假,所以公司都係出奇咁靜,安安靜靜又到一點鐘,收工~
後記: 出人頭地法則四：正視問題才能解決

和您吹吹風 9月22日 星期五 又行衰運喇......點解呢一排咁運滯架,今晚諗住遲些少先收工,因為今日係星期五,夜晚會特別多人搭車返屋企,本來以為等到七點收工實冇死啦,點知先等第一部巴士......爆,之後再等多一架......又爆,十分鐘嚟多一架......爆到飛站,再等多十分鐘左右......可以上車,前後已經唔見半個鐘頭,心諗有位坐就算數啦! 巴士飛奔到屯門公路嘅一半左右,誰不知惡夢就由呢一刻開始喇......前面竟然撞車車呀,已經有半年冇遇過嘅屯門大塞車,終於都重現眼前喇~ 後記: 出人頭地法則三：人之所為，多看回報

又熱返 9月21日 星期四
我個細妹今日無端端call我,叫我落去地下幫佢攞月餅返屋企比阿媽,其實我就冇咩所謂,反正都係放工返屋企,順個便啦! 一落到樓就見到細妹,我覺得好出奇喎,我見佢手上只有兩個迷你月餅,玩我咩......得咁少嘢就叫我幫手,不過細妹都好識趣,佢附送一支冰凍嘅柑桔水比我飲,即時下火呀~
後記: 出人頭地法則二：為自己的行為負責